(غلطة.ما غلطت) ..للشاعر د. علي مسلم عجمي
(غلطة.ما غلطت) ..للشاعر د. علي مسلم عجمي
----------------------
غنيتها بلحن الخلود السرمدي
غير قلبي ما حدا عليها هِدي
غالية عندي و ما في إلها نظير
غطى شذاها رونق العطر الندي
غلِّت ببحر العاطفة بسرُّو الكبير
غاصت بقاعو و الجواهر قاصدي
غابة ورود العطر داخلها وفير
غَسَّلتها بشذى زهور مورَّدي
غيبة زمن لو وجهها البدر المنير
غاب عنو ولو بساعة محددي
غلغلت فيي حب شلالو غزير
غادة عواطف عشقها بقلبي بِدي
غِفيت عيوني عا حلم سرو خطير
غبنو نهاني ما قبل ما يبتدي
غرَّدِت و بصوتها البلبل أسير
غَندرة بتمشي.. الحجل فيها بيقتدي
غِش ما بتعرف و لا قلبا ضرير
غلطة ما غلطِت لو بكلمة مسوَّدي
غط اليمام و بنى خصلات الحرير
غيمة تظللها لشمس الموقدي
غـرِقت بهواها و ما إلي غيرا نصير
غصب عني يا سما الزرقا اشهدي
غمازتين خدودها مشهد مُثير
غرسِت نعومة في لطافة مأكدي
غبرة حسد عالناس ما بتعرف تغير
غدر و نميمة ما لها و لا حاسدي
غروب الشمس في شعرها الأسود كتير
غازل شروق النور دفعة واحدي
الشاعر د. علي مسلم عجمي
لبنان
تعليقات